Во Велес се одржа првата обука за финансиско знаење во земјоделието

Денес, 06 Март 2017 година, во хотелот Гарденија во Велес, се одржа првата обука од 5-те предвидени обуки (по градови) за финансиско знаење во земјоделието. Обуките се дел од проектот „Инклузија и иновација во микрофинансирањето“ кој е финансиран од УСАИД а го спроведува „Македонската развојна фондација за претпријатија“ (МРФП). Главната цел на проектот е подобрување на пристапот до финансии особено до лицата кои се земјоделци/фармери, претприемачи, лица со пониски примања, студенти, мали и микро претпријатијата. Проектот е спроведуван во партнерство со Сојузот на Микрофинансиски организации, Штедилница Можности, Фондација Хоризонти и Штедилница ФУЛМ.

МРФП во рамки на проектот спроведува обуки за финансиско знаење за повеќе целни групи меѓу кои и земјоделци/фармери. Обуките во областа на земјоделието ги спроведува заедно со „Здружението за земјоделци Агро Фаланга“ кое е партнер во проектот и  учествува во организирањето на овие обуки. За таа цел здружението ги информираше своите членови за можноста и корисноста од овој вид на обуки, па така и интересот за истите беше голем. Од 5-те градови во кои ќе се одржат дводневните обуки, Велес е прв град во кој денес се одржа првиот ден од обуката.

Во хотелот Гарденија беа присутни раноградинари, овоштари, лозари, житари, пчелари и сточари. Сточарите имаа можност да присуствуваат на обуките на покана од „ЗЗ Агро Фаланга“, а благодарејќи на соработката на здружението и „Јавното претпријатие за стопанисување со пасишта“. Краток вовед во проектот и обуките даде Димитар Смилјановски, претставник на МРФП, а малку повеќе за соработката и потребата од вакви обуки, едукација и здружување на земјоделците, говореше Љупче Станковски, претседателот на „ЗЗ Агро Фаланга“.  Сите присутни активно се вклучија во дискусиите кои ги наметна предавачот Влатко Данилов, а воедно имаа и можност да постават прашања во рамките на темите кои се предвидени во првиот ден од обуките.

Свој простор на денешната обука добија и претставници од Штедилница Можности, Фондација Хоризонти и Штедилница ФУЛМ. Тие имаа можност да ги претстават своите продукти наменети за земјоделци, но и да ги сослушаат земјоделците во врска со проблемите со кои тие се соочуваат со кредитниот систем во РМ.

Првиот ден од обуките помина во исрцпни дискусии по однос на темите кои беа опфатени, но и во конструктивни прашања од страна на присутните земјоделци. Додека акцентот на денешните предавања беше на финансискиот систем во РМ и можностите за кредитирање, утрешното предавање ќе биде насочено кон земјоделецот, односно регистрација како индивидуален земјоделец, земјоделски пензии, можности за здружување и др.

Фотографиите од денешната обука може да ги погледнете во продолжение, веднаш под текстот.