На 16 Ноември 2016 година, Цивика Мобилитас организираше форум насловен како „Време на предизвици“. Форумот се одржа во хотелот Дрим во Струга каде учествуваа над 350 претставници на граѓански организации, општини, ученици, граѓани, студенти, меѓу кои свои претставници имаше и ЗЗ Агро Фаланга.
На националниот форум се одржаа 21 настан кои беа организирани од граѓанските организации, а во Social Change market се претставија триесетина организации.
Претставниците на Агро Фаланга учествуваа во носечкиот панел на тема „Време на предизвици – улогата на граѓанското општество во унапредувањето на демократијата во Македонија. Претседателот на Агро Фаланга, Љупче Станковски зема учество во дискусијата на овој панел и укажа на маргинализацијата на земјоделците кои всушност претставуваат една голема бројка од популацијата која не е за потценување и доколку би се опфатила со програмите за поддршка на граѓанските организации и активно би се вклучила во граѓанските процеси и активности, тогаш таа може да има огромно влијание врз менувањето на општествените прилики.
Форумот претставуваше уште една прилика Агро Фаланга да ја потенцира маргинализацијата на земјоделците и потребата за нивна интеграција во граѓанското општество, застапувајќи ги како и секогаш правата и интересите на земјоделците.
